ᐳᕙᓪᓗᓇᕐᒥᒃ ᖃᐅᔨᓴᐅᑏᑦ
ᐅᕆᐊᕐᑎᑕᐅᓂᖅ
ᐊᐊᑦᔨᒍᐊᑦ ᒪᑉᐱᒉᓪᓗ/ᑐᑭᓯᒪᒍᑎᐅᒍᓐᓇᑐᑦ
ᓱᓇᒋᓐᓈ?
‘ᐅᕆᐊᕐᑎᑕᐅᓂᒃᑯᑦ ᖃᐅᔨᓴᐅᑎᒃ’-ᓚᒐᓗᐊᕐᑐᒍᑦ, ᑭᓯᐊᓂ ᐅᕆᐊᑐᐃᓐᓇᒥᒃ ᐅᖄᖕᖏᑐᒍᑦ. ᐳᕙᒻᒦᑐᒥᓪᓕ ᓄᕙᒻᒥᒃ ᐅᕆᐊᕐᑕᐅᖁᔨᔪᒍᑦ.
ᐃᓄᒃ ᖁᐃᕐᑐᖁᔭᐅᓲᖅ ᐅᕆᐊᓚᖓᓗᓂ ᖃᔫᑦᑕᒧᑦ ᓄᕙᒻᒥᒃ ᐳᕙᒻᒦᔨᐊᒥᓂᒃ.
ᐊᑕᐅᓯᐊᑐᐃᓐᓇᕈᓐᓇᑐᖅ ᑭᓯᐊᓂ ᐃᓚᖓᓂ ᐱᖓᓱᕕᒋᐊᓕᒃ ᓯᑕᒪᕕᓪᓗᓂᓗᓐᓃᑦ.
ᐅᑯᐊ ᖃᔫᑦᑕᕆᐊᓪᓓᑦ ᐊᑐᕐᑕᐅᓲᑦ ᖃᐅᔨᒐᓱᐊᕈᑕᐅᑦᓱᑎᒃ ᖃᓄᓪᓗᐊᑎᒋᒃ ᐳᕙᓪᓗᓇᐅᑉ ᖁᐱᕐᕈᑯᓗᖓ ᑎᒥᒥᒻᒪᖔᑦ.
ᐅᕆᐊᕐᑎᑕᐅᓂᒃᑯᑦ ᖃᐅᔨᓴᐅᑎᒃ
ᖃᐅᔨᓴᕐᓂᖅ ᐊᑑᑎᔭᐅᓲᖅ ᖃᕆᐊᒥ ᐊᓂᕐᓂᖃᑦᓯᐊᑎᑕᐅᔪᒥ (ᖃᕆᐊᖅ ᓴᓗᒻᒪᓭᑎᓕᒃ ᐊᓂᕐᑎᕆᔭᐅᔪᒥᒃ) ᐅᕝᕙᓗᓐᓃᑦ ᓯᓚᒦᒍᓐᓇᒥᔪᖅ.
ᐃᓄᒃ ᓂᐅᕐᓯᑎᑕᐅᓲᖅ ᖃᐅᓯᕐᑐᒥᒃ ᓱᐴᕐᑐᒧᑦ (ᑕᕆᐅᓪᓕᓯᒪᔪᖅ ᐃᒪᖅ) ᖁᐃᕐᑐᓚᕿᑎᑦᓯᒍᑎᒃ.
ᐃᓄᒃ ᖃᔫᑦᑕᒨᕆᓕᕋᔭᕐᑐᖅ ᐅᕆᐊᕐᑕᒥᓂᒃ ᑖᓐᓇᓗ ᐋᓐᓂᐊᓯᐅᕐᑎᐅᑉ ᐊᐅᓪᓚᑎᓕᕋᔭᕐᑕᖓ ᖃᐅᔨᓴᕐᑕᐅᑎᒋᐊᕐᑐᓗᒍ.
ᐃᓄᒃ ᓂᕆᒋᐊᖃᖕᖏᑐᖅ ᐃᒥᕆᐊᖃᕋᓂᓗ ᐃᒪᑐᐃᓐᓇᐅᑉ ᐊᓯᐊᓂᒃ ᑫᕙᓪᓚᒍᓯᓕᒫᒥ ᐅᕆᐊᕐᑎᑕᐅᓚᐅᕋᓂ.
ᓱᒧᑦ ᐅᕆᐊᕐᑎᓯᓂᒃᑯᑦ ᖃᐅᔨᓴᓲᖑᕕᑕ?
ᐅᕆᐊᕐᑎᓯᓂᒃᑯᑦ ᖃᐅᔨᓴᕐᓂᖅ ᐱᒻᒪᕆᐅᓂᕐᐸᐅᖃᑎᐅᔪᖅ ᖃᐅᔨᒍᑕᐅᖑᓐᓇᕋᒥ ᐁᑦᑐᑑᑕᐅᒍᓐᓇᑐᖅ ᐳᕙᓪᓗᓇᖅ ᐳᕙᓐᓃᒪᖔᑦ.
ᖃᐅᔨᒐᓱᐊᕈᑕᐅᓲᖅ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓇᕐᒥᒃ ᐃᓄᓐᓂ ᒪᓗᓐᓇᐅᑎᓕᓐᓂ, ᐅᕝᕙᓗᓐᓃᑦ ᑕᕐᕋᑐᕐᑕᐅᒍᑎᖓ ᐁᑦᑐᑑᑕᐅᒍᓐᓇᑐᒥᒃ ᐳᕙᓪᓗᓇᖃᕐᓂᐊᖒᕐᓯᐸ, ᐅᕆᐊᕐᑎᓯᓂᒃᑯᑦ ᖃᐅᔨᓴᕐᓃᑦ:
ᓱᕐᖁᐃᓯᒍᑎᒋᓲᕗᑦ ᐁᑦᑐᑑᑕᐅᒍᓐᓇᑐᒥᒃ ᐳᕙᓗᕈᑎᖃᕐᒪᖔᑦ ᐳᕙᒻᒥᒍᑦ.
ᑐᑭᓯᒍᑎᒋᑦᓱᒍ ᖃᓄᓪᓗᐊᑎᒌᒃ ᐳᕙᓪᓗᓇᕐᑐᑕᖃᕐᒪᖔᑦ ᐳᕙᒃᑯᑦ.
ᑐᑭᓯᒍᑎᒋᑦᓱᒍ ᖃᓄᓪᓗᐊᑎᒌᒃ ᐁᑦᑐᑑᐃᒍᓐᓇᕈᑎᖃᕐᒪᖔᑦ ᐃᓄᒃ.
ᐃᓄᓐᓂ ᐄᕐᖃᓕᕇᕐᑐᓂᒃ ᐳᕙᓪᓗᓯᐅᑎᓂᒃ, ᐅᕆᐊᕐᑐᓂᒃᑯᑦ ᖃᐅᔨᓴᕐᓃᑦ:
ᐃᑲᔪᕐᓯᓲᑦ ᐅᕙᑦᑎᓂᒃ ᓱᕐᖁᐃᓯᒍᑎᒋᒍᓐᓇᕋᑦᑎᒋᑦ ᒪᒥᓴᐅᑏᑦ ᒪᒥᓭᑦᓯᐊᕋᓗᐊᕐᒪᖔᑕ (ᐃᓄᒃ ᒪᒥᑉᐸᓕᐊᑦᓯᐊᕋᓗᐊᕐᒪᖔᑦ ᐳᕙᓪᓗᓇᕐᒥᓗ ᑎᒥᒥᐅᑕᖃᕈᓐᓀᕙᓪᓕᐊᓯᐊᕐᒪᖔᑦ)
ᖃᐅᔨᒍᑎᒋᓲᕗᑦ ᐃᓄᒃ ᐁᑦᑐᑐᐃᒋᐊᓪᓚᕕᖃᕈᓐᓀᒪᖔᑦ.
 | ᐅᑦᑐᕋᐅᑎᒃ ᐅᖄᖃᑎᖃᕐᓂᒧᑦ ᐃᓄᒻᒥᒃ ᐅᕆᐊᕐᑐᓂᒃᑯᑦ ᖃᐅᔨᓴᕐᑕᐅᖁᔭᐅᔪᒥᒃ: |
ᑐᖕᖓᓱᑦᑎᓗᒍ ᑲᑉᐱᐊᓱᖁᖕᖏᓗᒍ
ᐳᕙᓪᓗᑐᓕᕆᔨ ᐋᓐᓂᐊᓯᐅᕐᑎ ᐅᕆᐊᕐᑐᓂᒃᑯᑦ ᖃᐅᔨᓴᕐᑕᐅᖁᔨᔪᖅ. ᐅᕆᐊᕐᑐᓂᒃᑯᑦ ᖃᐅᔨᓴᕈᒪᓚᕿᔪᒍᑦ ᑕᕐᕋᑐᕐᑕᐅᒍᑎᑎᑦ ᑕᑯᑦᓴᐅᑎᑦᓯᒪᑕ ᐳᕙᑎᓐᓂᒃ ᐳᕙᓪᓗᓇᕐᑕᖃᕐᓂᐊᖒᕆᑦᓱᒋᑦ, ᑖᓐᓇᓗ ᐅᕆᐊᕐᑐᓂᒃᑯᑦ ᖃᐅᔨᓴᐅᑎᒃ ᐱᐅᓂᕐᐸᐅᒪᑦ ᓱᕐᖁᐃᓯᒍᑎᒋᒐᓱᐊᕆᐊᖓ ᑐᑭᓯᒋᐊᓪᓚᕈᑎᒋᓚᖓᑦᓱᒍᓗ.
ᑲᑉᐱᐊᓇᕐᑑᔭᑑᒐᓗᐊᖅ ᑭᓯᐊᓂ ᐱᐅᓂᕐᐹᖅ ᑐᑭᓯᑦᓯᐊᕈᑎᒋᒋᐊᖓ ᑐᑭᑖᖕᖏᓂᕗᓐᓂ.
ᓱᓇ/ᓱᒧᑦ
ᐊᐅᓚᔨᒍᓇᑦᓴᑐᑎᑦ ᐅᕆᐊᕐᑎᑕᐅᓚᐅᕐᓯᒫᒻᒪᖔᑉᐱᑦ ᑕᑦᓱᒪ ᓯᕗᓂᐊᒍᑦ?
ᑐᑭᓯᓇᕐᑎᒋᐊᓪᓚᓚᐅᕐᓇᒍ ᑕᒪᓐᓇ, ᐊᐱᕆᒍᒪᔭᖏᑦ - ᓂᕆᓯᒪᕖᑦ ᑫᕙᓪᓚᒍᓯᐅᑫᓐᓇᑐᒥ?
ᐅᕆᐊᕐᑎᑕᐅᓂᒃᑯᑦ ᖃᐅᔨᓴᕐᑕᐅᓚᖓᔪᑎᑦ ᐊᓂᕐᓂᖃᑦᓯᐊᑎᑕᐅᔪᒥ ᖃᕆᐊᕐᒥ. “ᐅᕆᐊᖅ” ᐅᖃᐅᓯᖅ ᓇᓛᒍᑦᓯᐊᖏᑦᑐᒐᓗᐊᖅ ᖃᐅᔨᓴᕐᓂᒧᑦ ᓄᕙᒻᒥᓕ ᐳᕙᑎᓐᓃᑐᒥᒃ ᑕᑯᖔᕈᒪᒐᑦᑕ.
ᐊᑑᑎᔭᐅᓚᖓᔪᑦ
ᐅᓇ ᐃᑭᑎᓯᔭᕋ ᖃᐅᓯᕐᑐᒥᒃ ᓲᐴᕐᑎᓯᒍᑎᒃ ᖁᐃᕐᑐᓚᕿᒍᑎᒋᓂᐊᕐᑕᓂᒃ.
ᖃᕆᐊᒦᓚᖓᖕᖏᑐᖓ ᑌᒣᓘᕐᑎᓗᑎᑦ ᑭᓯᐊᓂ ᐅᕆᐊᕆᐊᖃᕐᑐᑎᑦ ᐅᕗᖓ ᖃᔫᑦᑕᒧᑦ. ᐅᕗᖓ ᓇᓗᓀᕐᓯᒪᔪᒧᑦ ᐅᕆᐊᕐᑐᑌᑦ ᑕᑌᑉᐸᑦ, ᓄᕐᖃᕈᓐᓇᑐᑎᑦ.
ᐅᑎᑦᓴᐅᑎᒋᓚᖓᔪᖓ ᖃᐅᔨᖏᐊᕐᓗᒋᓪᓗ, ᑭᓯᐊᓂ ᐱᔭᕇᑲᐱᒍᕕᑦ ᑖᓐᓇ ᖃᔫᑦᑕᖅ ᒪᑐᒍᓐᓇᑌᑦ, ᕿᒪᓪᓗᒍᓗ ᐊᓂᕐᓂᖃᑦᓯᐊᑐᒥᒃ ᖃᕆᐊᒥ ᖃᐅᔨᑎᑦᓯᓗᑎᓪᓗ ᐅᕙᓐᓂᒃ ᐳᕙᓪᓗᑐᓕᕆᔨᒥᓪᓗᓃᑦ ᐋᓐᓂᐊᓯᐅᕐᑎᒥᒃ.
ᐳᕙᓪᓗᑐᓕᕆᔨ ᐋᓐᓂᐊᓯᐅᕐᑎ ᓯᑕᒪᕕᓪᓗᓂ ᐅᕆᐊᕐᑐᓂᒃᑯᑦ ᖃᐅᔨᓴᕐᑕᐅᖁᔨᔪᖅ, ᐊᑕᐅᓯᐅᓚᐅᑲᑦᑐᖅ ᒫᓐᓇ. ᙯᒋᐊᓪᓚᕋᔭᕈᓇᑦᓴᑐᑎᑦ ᕿᑎᕋᓕᕇᕐᐸᑦ ᐅᕆᐊᕐᑐᕆᐊᓪᓚᕆᐊᕐᑐᓗᑎᑦ?